‘नेपाल कफी फेस्टिभल एण्ड च्याम्पियनसिप २०८१’ सानेपामा सुरु, नेपाली कफी प्रवर्द्धनमा जोड                

  काठमाडौं । नेपाली कफीको गुणस्तर सुधार, उत्पादन वृद्धि र बजार विस्तारमा योगदान पु¥याउने लक्ष्यसहित नेपाल कफी व्यवसायी महासंघले ‘नेपाल कफी फेस्टिभल एण्ड च्याम्पियनसिप २०८१’ को आयोजना गरेको छ । चैत २१ गतेदेखि ललितपुरको सानेपामा सुरु भएको यो तीनदिने फेस्टिभल चैत २३ गते शनिबारसम्म चल्नेछ । मेला उत्पादकदेखि उपभोक्तासम्मलाई जोड्ने उद्देश्यले आयोजना गरिएको हो । महासंघका अध्यक्ष ओमनाथ अधिकारीका अनुसार, मेलाले कफी क्षेत्रका सरोकारवाला सबैलाई एकसाथ ल्याउने, सम्भावना पहिचान गर्ने, र अनुभव आदानप्रदानको प्ल्याटफर्मको रूपमा काम गर्नेछ ।

उनले भने, “फेस्टिभलको मूल लक्ष्य नेपाली कफीको आन्तरिक र बाह्य बजार विस्तार गर्नु, कफीमा आधारित उद्यमशिलता प्रवद्र्धन गर्नु, र प्रतिस्पर्धात्मक क्षमतामा वृद्धि गर्नु हो।” यो मेला व्यापार, ज्ञान र समन्वयको त्रिवेणी बन्ने साथै नेपालको कफी उद्योगलाई नयाँ दिशा दिन कोशेढुंगाको रुपमा स्थापित हुने विश्वास समेत गरिएको छ ।फेस्टिभलमा कफी प्रदर्शनी, स्वाद परीक्षण, राष्ट्रिय प्रतियोगिता, र विभिन्न कफी ब्रान्ड तथा उद्यमीहरूद्वारा उत्पादन गरिएको कफी र सेवाको प्रदर्शन गरिएको छ । कफीको गुणस्तर सुधार, उत्पादनमा नवप्रविधिको प्रयोग र युवाहरूको आकर्षण बढाउन यस्तो मेला अपरिहार्य रहेको रोयल हिमालय कफीका सञ्चालक मदन सापकोटाको भनाई छ । सापकोटाका अनुसार कफी उद्योगमा युवाको संलग्नता वृद्धि गर्दै मेलाले भविष्यमा रोजगारी सिर्जनामा समेत टेवा पु¥याउने छ ।आयोजकका अनुसारः फेस्टिभलले किसान, व्यापारी र उपभोक्ताबीचको दूरी हटाएर सञ्जाल विस्तार गर्न महत्वपूर्ण भूमिका खेल्नेछ ।