नेपाल निर्माण व्यवसायी महासंघको आयोजनामा मिति २०८३ मंसिर ५ र ६ गते काठमाडौंको अनामनगरस्थित महासंघ सचिवालयमा सार्वजनिक खरिद प्रक्रियासँग सम्बन्धित विद्युतीय सरकारी खरिद प्रणाली (Electronic Government Procurement – e-GP) सम्बन्धी दुईदिने तालिम शुभारम्भ गरिएको छ।
उक्त तालिमको उद्घाटन महासंघका वरिष्ठ उपाध्यक्ष रामजी पन्तले गर्नुभएको थियो। उद्घाटन समारोहमा मन्तव्य व्यक्त गर्दै उहाँले वर्तमान समयमा सार्वजनिक खरिद प्रक्रियामा e-GP प्रणालीको महत्व बढ्दै गएको सन्दर्भमा निर्माण व्यवसायीहरूलाई यस प्रणालीसम्बन्धी व्यावहारिक ज्ञान, सीप र प्राविधिक दक्षता हासिल गराउनु आवश्यक रहेको बताउनुभयो।
कार्यक्रममा महासंघका महासचिव शिवहरि घिमिरेले स्वागत मन्तव्य व्यक्त गर्नुभएको थियो। उहाँले तालिमले निर्माण व्यवसायीहरूलाई विद्युतीय खरिद प्रणालीको प्रभावकारी प्रयोग, बोलपत्र प्रक्रियामा सहभागिता तथा प्रक्रियागत जटिलता समाधान गर्न सहयोग पुग्ने विश्वास व्यक्त गर्नुभयो। कार्यक्रमको सञ्चालन महासंघका उपमहासचिव (नीतिगत) मंगल बहादुर शाहीले गर्नुभएको थियो।
दुई दिनसम्म सञ्चालन हुने उक्त तालिममा e-GP प्रणालीको प्रयोग, विद्युतीय बोलपत्र (E-Bidding) प्रक्रिया, बोलपत्रसम्बन्धी कागजातको तयारी तथा पेस गर्ने विधि र सार्वजनिक खरिद प्रक्रियामा अपनाउनुपर्ने प्राविधिक एवं प्रक्रियागत विषयहरूमा जानकारी तथा व्यावहारिक प्रशिक्षण प्रदान गरिनेछ।
निर्माण व्यवसायीहरूको संस्थागत तथा प्राविधिक क्षमता अभिवृद्धि गर्दै सार्वजनिक खरिद प्रक्रियामा उनीहरूको पहुँच, सहभागिता र प्रतिस्पर्धात्मक क्षमता थप सुदृढ बनाउने उद्देश्यले आयोजित यस तालिमले निर्माण क्षेत्रको व्यावसायिक दक्षता र सुशासन प्रवर्द्धनमा महत्वपूर्ण योगदान पुर्याउने महासंघले विश्वास लिएको छ।

प्रतिक्रिया