भारत लैजाने–ल्याउने नेपाली र भारतीय मुद्राको सीमा स्पष्ट

काठमाडौं । सरकारले नेपाली तथा भारतीय नागरिकले भारत लैजान र नेपाल भित्र्याउन पाउने नेपाली तथा भारतीय मुद्रासम्बन्धी व्यवस्था स्पष्ट पारेको छ ।राजपत्रमा प्रकाशित सूचनाअनुसार भारतीय रुपया १०० भन्दा कम दरका बैंक नोट र कुनै पनि दरका नेपाली मुद्रा नेपाली र भारतीय नागरिकले असीमित रूपमा भारत लैजान पाउनेछन् ।तर, सन् २०१६ नोभेम्बर ९ पछि निष्कासन भई चलनचल्तीमा रहेका भारतीय रुपया २०० र ५०० दरका नोट भने नेपाली वा भारतीय नागरिकले प्रतिव्यक्ति अधिकतम २५ हजार भारतीय रुपयासम्म मात्र भारतबाट नेपाल भित्र्याउन तथा नेपालबाट भारत लैजान सक्ने व्यवस्था गरिएको छ ।भारत सरकारले सन् २०१६ नोभेम्बर ९ मा ५०० र १००० दरका भारतीय नोट नचल्ने गरी नोटबन्दी घोषणा गरेको थियो । सोही सन्दर्भमा, सूचनामा नोभेम्बर ९, २०१६ भन्दा अगाडि चलनचल्तीमा रहेका भारतीय रुपया ५०० र १००० दरका नोटको कुनै पनि कारोबार गर्न नपाइने स्पष्ट गरिएको छ ।नेपाली मुद्राको हकमा नेपाल राष्ट्र बैंकले तोकिदिएको सीमाभन्दा बढी र भारतीय मुद्राको हकमा भारतबाहेक अन्य मुलुकमा लैजान वा पठाउन नपाइने व्यवस्था रहेको छ । यद्यपि, कानूनबमोजिम इजाजतपत्रप्राप्त व्यक्ति वा संस्थाबाट विदेशी विनिमय सटही कारोबारमार्फत प्राप्त विदेशी मुद्रा भने नेपालबाट बाहिर लैजान वा पठाउन पाइनेछ ।त्यस्तै, विदेशी नागरिकले नेपाल राष्ट्र बैंकले तोकिदिएको सीमाभन्दा बढी विदेशी मुद्रा लैजान वा पठाउनुपर्ने अवस्थामा नेपाल प्रवेश गर्दा आफूसँग ल्याएको नगद विदेशी मुद्रा भन्सार अधिकृतसमक्ष घोषणा गरी प्रमाणित गराउनुपर्ने व्यवस्था गरिएको छ ।सरकारले यस सूचनामार्फत सीमा नाकामा हुने मुद्रा कारोबारलाई व्यवस्थित, पारदर्शी र कानूनसम्मत बनाउने उद्देश्य लिएको जनाएको छ ।