images

कर्णालीको विकासमा नयाँ आशा, समृद्धिको यात्रामा ऐतिहासिक उपलब्धि!

वर्षौंदेखि विकासको प्रतीक्षामा रहेको कर्णालीका लागि कर्णाली करिडोरको दक्षिण खण्ड (खुलालु–सलिसल्ला सडक) र उत्तर खण्ड (हिल्सा–सिमिकोट सडक योजना) अन्तर्गत सडक कालोपत्रे गर्ने कार्यका लागि कुल रु. ४ अर्ब ४ करोड ६८ लाख ८९ हजार ५ सय ६९ रुपैयाँ २ पैसा बराबरको ठेक्का सम्झौता प्रक्रिया अघि बढ्नु कर्णालीको विकास यात्रामा महत्वपूर्ण उपलब्धि हो।
यो केवल सडक निर्माणको विषय होइन, कर्णालीका जनताको सपना, सम्भावना र समृद्धिसँग जोडिएको विषय हो। यसले कर्णालीको आर्थिक, सामाजिक, पर्यटन तथा व्यापारिक विकासका नयाँ ढोका खोल्नेछ। दुर्गम भूगोलका कारण वर्षौंदेखि भोग्दै आएको आवागमनको कठिनाइ कम गर्न र कर्णालीलाई राष्ट्रिय तथा अन्तर्राष्ट्रिय सडक सञ्जालसँग जोड्न यस आयोजनाको विशेष महत्व रहनेछ।
यस सन्दर्भमा राष्ट्रिय स्वतन्त्र पार्टी (रासपा) कर्णाली प्रदेशका उपसभापति तुलराज शाहीले सरकारको यस कार्यको सकारात्मक स्वागत गर्दै विकासका कामलाई राजनीतिक पूर्वाग्रहभन्दा माथि उठेर हेर्नुपर्ने धारणा व्यक्त गर्नुभएको छ।
उहाँको विचारमा, सरकार जुनसुकै पार्टीको होस्, जनताको हितमा हुने कामको खुलेर प्रशंसा गर्नुपर्छ। विगतका सरकार, राजनीतिक दल तथा नेतृत्वले गरेका योगदानलाई पनि सम्मान गर्नुपर्छ। विगतलाई गाली गरेर होइन, राम्रा कामको निरन्तरता र कमजोरीको रचनात्मक सुधारबाट मात्रै समृद्धिको यात्रा अघि बढ्न सक्छ।
हामीलाई राजनीतिक प्रतिशोध होइन, विकास चाहिएको छ। आरोप–प्रत्यारोप होइन, परिणाम चाहिएको छ। भाषण होइन, जनताले अनुभूति गर्ने परिवर्तन चाहिएको छ।
सरकारले अघि बढाएका यस्ता महत्वपूर्ण आयोजनाहरू गुणस्तरीय, पारदर्शी र निर्धारित समयमै सम्पन्न होऊन्। निर्माण व्यवसायी, प्राविधिक तथा सम्बन्धित निकायबीच प्रभावकारी समन्वय कायम होस् र विनियोजित बजेटको सदुपयोग होस् भन्ने अपेक्षा गर्दछौँ।
कर्णालीको विकास कुनै एक दल वा सरकारको मात्र उपलब्धि होइन, यो समग्र कर्णालीवासीको साझा सपना र साझा जिम्मेवारी हो।
राम्रा कामको प्रशंसा गरौँ, कमजोरीमा खबरदारी गरौँ र विकासमा सबैको सहकार्य सुनिश्चित गरौँ।
जय कर्णाली! समृद्ध कर्णाली, सुखी कर्णालीवासी!*

मङ्गलबार २ मंसिर २०८३ ०८:५९ PM मा प्रकाशित

प्रतिक्रिया