images

सुदूरपश्चिम रोयल्स बन्यो एनपीएल च्याम्पियन, लुम्बिनीलाई १० विकेटले हराउँदै रच्यो इतिहास

काठमाडौं । तेस्रो संस्करणको नेपाल प्रिमियर लिग (एनपीएल) को उपाधि सुदूरपश्चिम रोयल्सले जितेको छ। कीर्तिपुरस्थित त्रिवि क्रिकेट मैदानमा सम्पन्न फाइनल खेलमा लुम्बिनी लायन्सलाई १० विकेटले पराजित गर्दै सुदूरपश्चिमले पहिलोपटक एनपीएलको उपाधि उचालेको हो। लुम्बिनीले दिएको १५६ रनको लक्ष्य सुदूरपश्चिमले कुनै पनि विकेट नगुमाई मात्र १३.३ ओभरमा पूरा गर्‍यो। यससँगै लगातार दुई सिजन फाइनलमा पुगेर उपाधिबाट वञ्चित हुँदै आएको सुदूरपश्चिमले उपविजेताको ‘डेडलक’ तोड्न सफल भएको छ। सुदूरपश्चिमको जितका नायक बने जर्ज मन्से। उनले आक्रामक ब्याटिङ गर्दै मात्र ४९ बलमा अविजित १२५ रन बनाए। आफ्नो इनिङ्समा उनले १२ छक्का र ८ चौका प्रहार गरे। अर्का ओपनर विनोद भण्डारीले पनि अविजित ३० रनको योगदान दिए। लक्ष्य पछ्याउने क्रममा सुदूरपश्चिमले सुरुदेखि नै आक्रामक ब्याटिङ गर्‍यो। पहिलो ओभरमा १२ रन जोडेको टोलीले पावरप्लेमा कुनै विकेट नगुमाई ६० रन बनाएको थियो। मन्सेले २८ बलमै अर्धशतक पूरा गरेका थिए।

१० ओभरको समाप्तिमा सुदूरपश्चिमले बिना विकेटको क्षतिमा ९० रन बनाइसकेको थियो। त्यसपछि पनि मन्सेको आक्रामक ब्याटिङ रोकिएन। उनले ४९ बलमा शतक पूरा गर्दै एनपीएल फाइनलमा शतक प्रहार गर्ने पहिलो खेलाडीको कीर्तिमान बनाए। यसअघि टस हारेर पहिले ब्याटिङ गरेको लुम्बिनी लायन्सले निर्धारित २० ओभरमा ६ विकेट गुमाएर १५५ रन बनाएको थियो। लुम्बिनीको सुरुवात राम्रो हुन सकेन। सुदूरपश्चिमका स्कट कुगलेइनले दोस्रो ओभरमै आसिक शेखलाई १ रनमा आउट गर्दै पहिलो सफलता दिलाए। त्यसपछि कप्तान रोहित पौडेल ब्याटिङमा आए पनि ५.३ ओभरमा डार्सी शर्ट २१ रन बनाएर आउट भए। उनलाई कप्तान दीपेन्द्र सिंह ऐरीले पभेलियन पठाए। पावरप्लेमा दुई विकेट गुमाएर ३७ रन बनाएको लुम्बिनीको इनिङ्स कप्तान रोहित पौडेल र निरोशन डिकवेलाले सम्हाल्ने प्रयास गरे। डिकवेलाले १७ बलमा २८ रन बनाए पनि थरिन्दु रत्नायकेको बलमा बोल्ड भए। त्यसपछि दिलिप नाथले आक्रामक ब्याटिङ गर्दै टोलीको स्कोर बढाए। तर १४औँ ओभरमा दिलिप नाथसँग तालमेल नमिल्दा कप्तान रोहित पौडेल ३० रन बनाएर रनआउट भए। उनले ३१ बल खेलेका थिए। त्यसपछि आएका सन्दीप जोरा ५ बलमा ४ रन बनाएर आउट भए। अलि शेखले भने विष्फोटक ब्याटिङ गर्दै १२ बलमा २ छक्का र २ चौकासहित २४ रन जोडे। दिलिप नाथ ३९ रनमा अविजित रहे। सुदूरपश्चिमका तर्फबाट स्कट कुगलेइनले सर्वाधिक दुई विकेट लिए। हेमन्त धामी, दीपेन्द्र सिंह ऐरी र थरिन्दु रत्नायकेले एक–एक विकेट हात पारे। 
उपाधिसँगै डेढ करोड पुरस्कार 
एनपीएलको उपाधि जितेसँगै सुदूरपश्चिम रोयल्सले १ करोड ५० लाख रुपैयाँ पुरस्कार प्राप्त गरेको छ। उपविजेता लुम्बिनी लायन्सले ८० लाख रुपैयाँमा चित्त बुझाएको छ।
यसअघि एनपीएलका पहिलो र दोस्रो संस्करणमा पनि फाइनल पुगेको सुदूरपश्चिमले क्रमशः पाँच र ६ विकेटको हार व्यहोरेको थियो। तेस्रो संस्करणमा भने शानदार प्रदर्शन गर्दै अपराजित शैलीमा फाइनल जितेको सुदूरपश्चिमले अन्ततः च्याम्पियन बन्ने सपना पूरा गरेको छ।

शनिबार ६ मंसिर २०८३ ०८:२४ PM मा प्रकाशित

प्रतिक्रिया