सन्तोष बाबु लोहनी चलचित्र विकास बोर्डको सदस्य नियुक्त

काठमाडौं । चलचित्र विकास बोर्डमा सदस्यका रूपमा सन्तोष बाबु लोहनी नियुक्त भएका छन्। नेपाल सरकारको सञ्चार तथा सूचना प्रविधि मन्त्रालयले लोहनीलाई बोर्डको सदस्य पदमा मनोनीत गरेपछि आइतवार बोर्डले उनलाई स्वागत गर्दै कार्यकाल पूरा गरेका राजु खत्रीलाई विदाई गरेको हो। खत्रीको कार्यकाल चैत १८ गतेसम्म रहे पनि सो दिन सार्वजनिक बिदा परेकाले आइतवार नै औपचारिक रूपमा विदाई गरिएको हो। नवनियुक्त सदस्य सन्तोष बाबु लोहनी नेपाली फिल्म क्षेत्रमा निर्देशन, अभिनय र निर्माणमा सक्रिय एक प्रतिष्ठित व्यक्तित्व हुन्। उनले ‘अपमान’ फिल्ममार्फत नेपाली फिल्म उद्योगमा पाइला टेकेका थिए। ‘नारी, द वुमन’ र ‘शुभलभ’ जस्ता चलचित्र निर्देशन गरेका लोहनी ‘जय विजय’ जस्ता चर्चित चलचित्रमा मुख्य भूमिका निर्वाह गरेका छन्। अभिनयका साथै ‘सतरङ्गी’ र ‘हलो नेपाल’ जस्ता टेलिभिजन कार्यक्रमको निर्माण, निर्देशन तथा प्रस्तुति पनि गरेका छन्।

चलचित्र विकास बोर्डको ७४५औं बैठकले लोहनीलाई प्रवक्ताका रूपमा चयन गरेको छ। साथै, उनलाई बक्स अफिस कार्यान्वयन, चलचित्र अन्तर्राष्ट्रिय प्रवर्द्धन, आर्थिक सहयोग सिफारिस तथा मोफसल चलचित्र मूल्याङ्कन समितिको संयोजकको जिम्मेवारी दिइएको छ। यसअघि बोर्डका सदस्य रहेका राजु खत्रीले आफ्नो कार्यकालमा नेपाली फिल्मको प्रवर्द्धन, नीति निर्माण तथा फिल्म क्षेत्रको विकासमा महत्वपूर्ण योगदान पुर्‍याएका थिए। बोर्डले उनको सेवाको कदर गर्दै आभार व्यक्त गरेको छ। नवनियुक्त सदस्य लोहनीले नेपाली फिल्म क्षेत्रको प्रवर्द्धन, गुणस्तरीय सुधार तथा अन्तर्राष्ट्रिय बजारमा नेपाली फिल्मको पहुँच विस्तारका लागि प्रभावकारी भूमिका खेल्ने प्रतिबद्धता व्यक्त गरेका छन्। चलचित्र विकास बोर्डले उनको सफल कार्यकालको शुभकामना दिएको छ।