बाजुरामा निर्वाचन शान्तिपूर्ण बनाउन कडा सुरक्षा तयारी, प्रमुख जिल्ला अधिकारी डोरेन्द्र निरौला

बाजुरा । ‎बाजुरा जिल्लालाई निर्वाचनका बेला ‘अशान्त जिल्ला’ भनेर चित्रित गर्ने भाष्य गलत रहेको प्रमुख जिल्ला अधिकारी डोरेन्द्र निरौलाले बताए । विगतका निर्वाचनमा भएका केही दुर्भाग्यपूर्ण घटनाका आधारमा जिल्लालाई नकारात्मक रूपमा प्रस्तुत गर्नु उचित नभएको उल्लेख गर्दै उनले यसपटकको निर्वाचन शान्तिपूर्ण र व्यवस्थित रूपमा सम्पन्न गराउन व्यापक तयारी गरिएको जानकारी दिए ।‎उनका अनुसार जिल्लामा शान्ति सुरक्षाका लागि नेपाल प्रहरी, नेपाली सेना र सशस्त्र प्रहरी बल आ–आफ्नो जिम्मेवारी क्षेत्रमा परिचालित छन् । मतदान केन्द्रभित्र नेपाल प्रहरीको सुरक्षा रहनेछ भने बाहिरी घेरामा अन्य सुरक्षा निकाय परिचालन गरिनेछ । सम्भावित संवेदनशील क्षेत्रलाई लक्षित गर्दै मोबाइल फोर्स र गस्ती टोली समेत तयारी अवस्थामा राखिएको प्रशासनले जनाएको छ ।‎जिल्ला सुरक्षा समितिको नियमित बैठक तथा सरोकारवाला निकायसँग समन्वय गर्दै कुनै पनि प्रकारको तोडफोड वा हिंसात्मक गतिविधि हुन नदिन सतर्कता बढाइएको प्रजिअ निरौलाको भनाई छ । उनले स्थानीयवासीलाई नआत्तिन, नडराउन र शान्तिपूर्ण वातावरणमा मतदान प्रक्रियामा सहभागी हुन आग्रह गरेका गरे ।