पार्टीको नीतिविपरीत सांसद सापकोटा  विदेश जान लागेपछि     कार्यक्रम स्थगित

काठमाडौं । गैरआवासीय नेपाली संघ (एनआरएनए)को बद्री केसी समूहको एक विवादास्पद कार्यक्रममा माओवादी केन्द्रका एक जना सांसद थाइल्यान्ड र कम्बोडिया जाने तय भएपछि पार्टीभित्र हंगामा हुन पुगेको छ । यसबारे प्रचण्डको सचिवालयले हस्तक्षेप नै गर्नुपर्ने अवस्था सिर्जना भएको हो ।थाइल्यान्ड र कम्बोडियामा तय भएको कार्यक्रममा सहभागी हुन केन्द्रीय सदस्य तथा प्रतिनिधिसभा सदस्य माधव सापकोटा ‘सुवोध’ जाने तय भएकोमा अन्तिम समयमा स्थगित गरिएको हो । पार्टीमा समेत समन्वय नगरी उनी त्यहाँ जान लागेका थिए ।  जवकि माओवादी नेतृत्वले नै बद्री केसी समुहलाई स्वीकारेको छैन । यस्तो पृष्ठभूमिमा उनी पार्टीको नीतिविपरीत आफ्नै निर्णयका आधारमा जान खोजेपछि समस्या आएको हो ।नेकपा माओवादी केन्द्रका एसिया प्रदेश समितिका अध्यक्ष शनि कुमार ओलीले सबै विषय स्पष्ट भएपछि भम्रण स्थगित भइसकेको बताए । ‘माननीय माधव सापकोटालाई उक्त कार्यक्रम अनाधिकारिक र विवादास्पद हो भन्ने जानकरी नभएर हो । सबै कुराको जानकारी भएपपछि उहाँको भ्रमण स्थगित भएको छ’, उनले भने । उनको भ्रमणबारे सञ्चारमाध्यममा खबर आएपछि माओवादी केन्द्रका अध्यक्ष प्रचण्डको सचिवालयले आवश्यक एक्सन लिँदै भ्रमण स्थगित गराएको बताइएको छ । केसी समुहको एनआरएनएले थाइल्यान्ड र कम्बोडियामा छुट्टाछुट्टै सम्मेलन गर्दैछ । थाइल्यान्डको बैंककमा दोस्रो अन्तर्राष्ट्रिय युवा सम्मेलन मार्च १५  र १६  मा हुँदैछ । यस्तै मार्च १८ र १९ मा कम्बोडियाको फोनमपेन्हमा १० औं एसिया–प्यासिफिक क्षेत्रीय सम्मेलन गर्दैछ । जुन दुबै सम्मेलनमा आफू सहभागी हुन लागेको सापकोटाले समेत स्वीकारेका थिए । भ्रमण स्थगित भएपछि भने उनी सम्पर्कमा आएनन् । एनआरएनएभित्र जारी विवादका साथै सर्वोच्चले एकताको महाधिवेशन गर्न भनि दिएको परमादेशकाबीच केसी पक्षले उक्त सम्मेलन गर्न लागेको अभियन्ताहरु बताउँछन् । एनआरएनएको विवादका सन्दर्भमा गत चैत २१ गते सर्वोच्च अदालतले दिएको परमादेशअनुसार पूर्वअध्यक्ष शेष घलेले एकताको महाधिवेशन गराउने जिम्मेवारी पाएका छन् । घले नेतृत्वको उच्चस्तरीय समितिले केसी पक्षलाई एकता विथोल्ने गरी कुनै पनि गतिविधि नगर्न चेतावनी दिँदै आएको छ भने विभिन्न नाममा हुँदै आएका सम्मेलन समेत अवैध भएको जिकिर गर्दै आएको छ ।