लिटिल वडका विद्यार्थीको मार्मिक र सन्देशमुलक प्रस्तुतिहरूले खिच्यो अभिभावकको ध्यान

काठमाडौं । काठमाडौंको जोरपाटीस्थित अत्तरखेलमा अवस्थित लिटिल वड सेकेन्डरी स्कुलले आफ्नो २८औँ वार्षिकोत्सव तथा अभिभावक दिवस–२०८१ मनाएको छ ।स्कुलले शनिबार औपचारिक र विभिन्न सांस्कृति कार्यक्रम आयोजना गरी विद्यालय प्राङ्गणमै २८औँ वार्षिकोत्सव तथा अभिभावक दिवस मनाएको हो ।विद्यालय सञ्चालक समितिका अध्यक्ष पदमध्वज कार्कीको सभापतित्व र गोकर्णेश्वर नगरपालिकाका नगर प्रमुख दीपक कुमार रिसालको प्रमुख आतिथ्यतामा वार्षिकोत्सव तथा अभिभावक दिवस विशेष कार्यक्रम आयोजना गरिएको विद्यालयका निर्देशक नारद खड्काले जानकारी दिए ।उनका अनुसार कार्यक्रममा गोकर्णेश्वर नगरपालिकाकी उपप्रमुख सान्नानी लामा, प्याब्सन काठमाडौंका जिल्ला अध्यक्ष नवराज भट्ट र वरिष्ठ उपाध्यक्ष सुदर्शन थापा विशेष अतिथिका रूपमा सहभागी थिए । यस्तै, राष्ट्रिय संस्थागत विद्यालय संघ (निसान) अध्यक्ष सौर्यनाथ आचार्य र महासचिव नवराज सापकोटा, नुवाकोटको दुप्चेश्वर गाउँपालिका–४ का अध्यक्ष एवम् विद्यालयका अभिभावक ज्ञानबहादुर तामाङ, गोकर्णेश्वर नगरपालिका–८ का सदस्य तथा विद्यालयका अभिभावक सुमन लामा लगायत धेरै बिद्यालयका प्रधानाध्यापकहरू रस्थानीय टोलका महिला समाजका अध्यक्षहरू अथितीको रूपमा सहभागी भएका थिए ।विद्यालयका सम्पूर्ण विद्यार्थी, अभिभावक, शिक्षक÷शिक्षिका र कर्मचारीहरूको उपस्थिति रहेको भव्य समारोहमा नर्सरीदेखि कक्षा १२ सम्मका विद्यार्थीहरूले नेपालको सांस्कृति विविधता झल्काउँदै मनोरञ्जन र मार्मिक सन्देशहरूले भरिएका ३८ वटा प्रस्तुति दिएका थिए । विद्यार्थीहरूको कतिपय भावुक र मर्मस्पर्शी प्रस्तुतिबाट अभिभावकहरूको आँखा रसाएका देखिन्थे भने अन्य सन्देशमुलक र कतिपय मनोरञ्जनात्मक प्रस्तुतिबाट ओठमा हाँसो देखिन्थ्यो । साथै, शिक्षक÷शिक्षिकाको तर्फबाट विशेष नृत्यका साथै तीन वटा औपचारिक प्रस्तुति पनि समारोहमा प्रस्तुत गरिएको विद्यालयकी भाइस प्रिन्सिपल शर्मिला महर्जनले जानकारी दिइन् ।विद्यालयका बालबालिका स्वयम्ले बजाएको पियानिका, झ्याली, मादल र क्याजियमको धुनसँगै राष्ट्रिय गान र मङ्गलधुनसहितको दीप प्रज्ज्वलनबाट सुरू गरिएको समारोहमा विद्यालयका निर्देशक नारद खड्काले स्वागत मन्तव्य व्यक्त गरेका थिए भने विद्यालयका विद्यार्थीहरूबाट स्वागत गीत, मन्तव्य र नृत्य प्रस्तुत गरिएको थियो । यस्तै, विद्यालयका प्रिन्सिपल अरुण कुमार कँडेलले धन्यवाद मन्तव्य दिएका थिए भने अध्यक्ष पदमध्वज कार्कीले औपचारिक कार्यक्रमको समापन गरेका थिए ।कार्यक्रमका प्रमुख अतिथि दीपक कुमार रिसाललगायत अतिथिहरूले विद्यालयको प्रशंसा गर्दै शुभकामना मन्तव्य व्यक्त गरेका थिए । कार्यक्रममा सहभागि अतिथिहरूलाई विद्यालयका अध्यक्ष कार्कीले मायाको चिनोस्वरूप उपहार प्रदान गरे भने विद्यालयमा कार्यरत ४९ जना शिक्षक÷शिक्षिका र कर्मचारीलाई खादा र मालाले सम्मान गरिएको थियो ।८५० भन्दा बढि अभिभावकको उपस्थिति रहेको कार्यक्रमलाई लाइफ ओके टेलिभिजन र विद्यालयको आधिकारिक फेसबुक पेजबाट प्रत्यक्ष प्रशारण गरिएको थियो । कार्यक्रमको मुख्य सञ्चालनको भूमिका भाइस प्रिन्सिपल शर्मिला महर्जनले गरेकी थिइन् ।