उद्योगी–व्यवसायी र कलाकारबीच फुटसल खेल: महासंघको जीत

काठमाडौं । नेपाल उद्योग वाणिज्य महासंघको खेलकुद तथा मनोरञ्जन फोरमको संयोजनमा महासंघ र राष्ट्रिय कलाकारबीच आयोजित मैत्रीपूर्ण फुटसल प्रतियोगिता सम्पन्न भएको छ।

बालुवाटारस्थित ढुकु फुटसल मैदानमा सम्पन्न उक्त खेलमा महासंघको टोलीले कलाकार टोलीलाई ७–४ गोल अन्तरले पराजित गरेको हो।

कार्यक्रमको उद्घाटन नेपाल उद्योग वाणिज्य महासंघका अध्यक्ष चन्द्र ढकालले रिबन काटेर गरेका थिए। उद्घाटनपछि महासंघका पदाधिकारी र कलाकारबीच १० मिनेटको प्रदर्शन खेल खेलिएपछि आधिकारिक प्रतिस्पर्धा सुरु गरिएको थियो।

खेलको पहिलो हाफमा महासंघको टोलीले कलाकारलाई ३–० को अग्रता बनाएको थियो। दोस्रो हाफमा कलाकार टोलीले उत्कृष्ट प्रदर्शन गर्दै खेललाई ३–३ मा ल्याएपछि खेल रोमाञ्चक बनेको थियो। अन्तिम चरणमा महासंघले थप ४ गोल र कलाकार टोलीले १ गोल गर्दै खेल ७–४ मा समाप्त भएको हो।

खेलको उद्घाटन गर्दै अध्यक्ष ढकालले खेलकुदले प्रतिस्पर्धाभन्दा मित्रता, एकता र सहकार्यलाई मजबुत बनाउने उल्लेख गर्दै यस प्रकारका गतिविधिले उद्योगी–व्यवसायी र कलाकारबीचको सम्बन्ध अझ नजिक हुने बताए।

प्रतियोगितामा महासंघतर्फबाट अध्यक्ष ढकालसहित उपाध्यक्ष हेमराज ढकाल, ज्योत्सना श्रेष्ठ, कोषाध्यक्ष भरतराज आचार्य सहभागी थिए। त्यस्तै कलाकार टोलीमा शिव श्रेष्ठ, धिरेन शाक्य, रबिन्द्र खड्का, मोहन निरौला लगायत वरिष्ठ कलाकारहरूको सक्रिय सहभागिता रहेको थियो।

कार्यक्रमका संयोजक तथा महासंघ खेलकुद तथा मनोरञ्जन फोरमका अध्यक्ष हरि बहादुर कार्कीले उद्योगी–व्यवसायी र कलाकारबीचको मित्रता र सद्भाव सुदृढ गर्न मैत्रीपूर्ण प्रतियोगिता आयोजना गरिएको बताउँदै वरिष्ठ कलाकारहरूको सहभागिताले कार्यक्रम अझ रोचक र सफल भएको टिप्पणी गरे।