काठमाडौं । नेपाल निर्माण व्यवसायी महासंघको आयोजना तथा पुर्वाधार विकास मन्त्रालयकाे सोैजन्यल र सार्वजनिक खरिद अनुगमन कार्यालयको प्राविधिक सहयोगमा नयाँ विद्युतीय सरकारी खरिद प्रणाली (इजीपी सिस्टम) सम्बन्धी दुईदिने तालिम सम्पन्न भएको छ। मंसिर ५ र ६ गते सञ्चालित उक्त तालिममा ७५ जनाभन्दा बढी निर्माण व्यवसायी तथा सहभागीहरूले प्रशिक्षण प्राप्त गरेका छन्। तालिमको समापन समारोह महासंघका वरिष्ठ उपाध्यक्ष एवं अनुसन्धान, विकास तथा तालिम समिति संयोजक रामजी पन्त (मुकेश)ज्यूकाे सभापतित्व र प्रमुख आतिथ्यमा सम्पन्न भयाे । समापन कार्यक्रममा महासंघका महासचिव शिवहरी घिमिरेले स्वागत मन्तव्य व्यक्त गर्नुभएको थियो भने महासंघका कार्यालय प्रमुख प्रेम सिंह ऐरले कार्यक्रम सञ्चालन गर्नुभएको थियो।
तालिमका क्रममा नयाँ इजीपी सिस्टम को प्रयोग, विद्युतीय बोलपत्र प्रक्रियाका विभिन्न चरण, बोलपत्रसम्बन्धी कागजातको तयारी तथा पेश गर्ने विधि र प्रणाली सञ्चालनका व्यावहारिक पक्षहरूबारे सहभागीहरूलाई विस्तृत प्रशिक्षण प्रदान गरिएको थियो। साथै, सार्वजनिक खरिद प्रक्रियामा आइपर्ने प्राविधिक तथा प्रक्रियागत विषयहरूलाई सहज रूपमा सम्बोधन गर्न आवश्यक ज्ञान र सीपसमेत प्रदान गरिएको थियो। तालिमको समापन समारोहमा सफलतापूर्वक प्रशिक्षण सम्पन्न गर्ने सहभागीहरूलाई वरिष्ठ उपाध्यक्ष पन्तले प्रमाणपत्र वितरण गर्नु भएको थियो। निर्माण व्यवसायीहरूको प्राविधिक ज्ञान, क्षमता तथा दक्षता अभिवृद्धि गर्दै सार्वजनिक खरिद प्रक्रियामा उनीहरूको सहभागितालाई थप सहज, प्रभावकारी र प्रतिस्पर्धी बनाउने उद्देश्यले तालिम आयोजना गरिएको पन्तले बताउनु भयो ।
नयाँ इजीपी सिस्टमको प्रभावकारी प्रयोगले निर्माण व्यवसायीहरूलाई विद्युतीय बोलपत्र प्रक्रियामा थप सहजताका साथ सहभागी हुन तथा प्रणालीमा रहेका प्रक्रियागत र प्राविधिक पक्षहरू बुझ्न सहयोग पुग्ने विश्वास रहेको पन्तले बताउनु भयो। निर्माण क्षेत्रको बदलिँदो प्रविधि र सार्वजनिक खरिद प्रणालीसँग निर्माण व्यवसायीहरूलाई परिचित गराउँदै उनीहरूको व्यावसायिक तथा प्राविधिक दक्षता अभिवृद्धि गर्न महासंघले आगामी दिनमा पनि विभिन्न तालिम, अभिमुखीकरण तथा क्षमता विकासका कार्यक्रमलाई निरन्तरता दिने जनाएको छ।





प्रतिक्रिया